اسمع بقلبك....
هل تعلموا اخواني وأخواتي في الله أن الانسان للأسف الشديد يعصي الله بنعم الله !!
هل تعلمون كيف ذلك؟؟
لو نظر كل منا لحاله لعرف، ليتأمل كل منا نعم الله عليه ولنأخذ نعمة لايلتفت الكثير لها ألا وهي (الحواس) هي نعمة عظيمة جدا لكن للأسف نستخدمها كثيرا في معصية الله إلا من رحمه ربي من هذا...
حاسة الإبصار...عيناك قد تستخدمها في المعصية..كيف؟
الفرجة علي الكليبات إياها بتاعت المغنية اللي مش لابسة واللي نسيت تلبس واللي ما عندهاش نية تلبس ياعيني الدنيا حر عليها..لكن........تذكر أن نار جهنم اشد حرا يعني كل واحد عارف بيحب مين وها يحشر يوم القيامة مع مين...
طبعا انا لا احمل الشباب وحدهم هذا لكن...اختي ...ها...البنات كمان لازم نتقي الله يعني في الشارع مش لازم تبصي علي الحليوة ده او تتغزلي في الممثل الفلاني ابو عيون خضرا ولا المطرب اللي عنده مجانص وترابيس في ذراعه وبيشيل حديد
طبعا مش كل الشباب ولا كل البنات بيعملوا كده ولا هي دي المعاصي بس... لكن كل واحد فينا عارف نفسه وعارف بيعمل ايه وهو لوحده في البيت...أو مع الشلة...ولا في رحلة من غير الاهل...الخ
تعالوا نفكر بشكل تاني احسن ايه رأيكوا نخلي العيون وسيلة طاعة..... ازاي؟؟؟
يعني اقرأ مثلا في المصحف...أو ادرب عينيا علي قراءة سورة الملك...ليه؟...علشان حبيبي وحبيبك الرسول محمد صلي الله عليه وسلم(صليت عليه ولا لأ!!) وصانا نقرأها ونحفظها حد يقول ليه؟...حبيبك قال انها تنجي الانسان من عذاب القبر...بس!! لأ دي كمان تحاج عن صاحبها حتي تدخله الجنة....يا الله كل ده لما تقرأ 30 آية من كلام الحق جل وعلي...
بص دخلنا في نعمة تانية(لسانك)اللي لو تصونه يصونك يعني..يعني...يعني هاتخليه دايما عامر بذكر الله وبالقرآن ولا...ولا باغنية فلان وفلانة
ياتري مين منهم يخلي ربنا يحبك..؟!طبعا انتم عارفين
علي فكرة انا مخلصتش،نعمة البصر عايزة كتير كلام ومش هايخلص،مش هاطول عليكم عشان ما تملوش وتزهقوا.تابعوني تاني وهانكمل كلام إن شاء الله
ملحوظة:للأمانة العلمية ما سبق كان من وحي دروس الشيخ الفاضل الرائع محمود المصري(ابو عمار) ربنا يبارك له ويجازيه خير
انا سمعت له وبسمع له الحمد لله ودايما هاكتبلكم بإذن الله من الدروس اللي اسمعها
تابعوه علي قناة الناس يوم السبت الساعة6.45 ويوم الاثنين الساعة11 مساء